‘Oes rhiwin yn mynd i’r sdeddfod?’ Sillafu’r Gymraeg yn yr oes ddigidol

Digon niferus yw’r bobl hynny sy’n cwyno nad oes digon o Gymraeg i’w chlywed ar hyd a lled y wlad y dyddiau hyn. Ond anaml y bydd yr un bobl yn ymfalchïo bod mwy o Gymraeg nag erioed yn cael ei hysgrifennu y dyddiau hyn, a hynny gan fwy o bobl nag erioed. Diolch i’r we ac yn arbennig i’r cyfryngau cymdeithasol, mae’r Gymraeg yn cael ei hysgrifennu’n gyson gan ystod ehangach o bobl nag erioed o’r blaen.